Қозоғистонда коронавирусдан ўлганлар махсус полигонда дафн қилинади

Қозоғистоннинг Алмати шаҳри маъмурияти баёнотига кўра, коронавирус инфекциясидан ўлганлар шаҳар ҳудудидан ташқарида, махсус полигонда дафн қилинади. Бу ҳақда товар ва хизматларнинг сифати ва хавфсизлигини назорат қилиш департаменти раҳбари Айзат Молдагасимова хабар берди.

Фото: Владимир Третьяков / AP / TASS

Маъмурият томонидан тасдиқланган тартибга кўра, ўлганларнинг жасади ёриб кўрилмайди, аммо «махсус воситалар» билан дезинфекция ва изоляция қилинади.

«Алматида коронавирусдан ўлганлар йўқ, аммо зарур чора-тадбирларни белгилаб олганмиз. Шаҳар ҳудудидан ташқарида, аҳоли яшайдиган жойлардан узоқда бўлган полигон белгилаб қўйилди. У барча хавфсизлик чораларига кўра шаҳардан узоқда бўлади», – деди Молдагасимова.

Қозоғистонда 30 март ҳолатига коронавирус билан хасталанган 302 бемор аниқланган. Улардан бири вафот этган, 21 нафари соғайган. Инфекциянинг асосий ўчоқлари – Нур-Султон (168) ва Алмати (73) ҳисобланади. Ҳар иккала шаҳарда карантин эълон қилиниб, кириш ва чиқиш чекланган.

Тайёрлаган Сардор Юсупов

#Қозоғистон #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.