3 ҳафта ичида 17 млн америкалик ишсиз қолди

Коронавирус пандемияси сабабли киритилган чекловлар сабабли тобора кўпроқ америкаликлар ишидан маҳрум бўлмоқда.

Фото: CNN

АҚШда пандемия бошидан бери 17 млнга яқин киши, жумладан охирги ҳафтада 6,6 млн киши ишсизлик нафақаси олиш бўйича мурожаат қилган. Бу ҳақда Associated Press ахборот агентлиги хабар берди.

Бундай маълумотларни АҚШ меҳнат вазирлиги тақдим қилган. Охирги 3 ҳафта ичида тахминан 10 америкаликдан бири ишини йўқотган.

Меҳнат бозорининг бундай қисқариши 1948 йилдан бери олиб бориладиган статистик кузатувлар давомидаги антирекорд бўлди. Май бошида АҚШда ишсизлик даражаси 15 фоизга етиши кутилмоқда.

Апрель ҳолатига кўра, АҚШнинг 48 штатида иккинчи даражали корхоналар ўз ишини тўхтатган. Ресторанлар, меҳмонхоналар, савдо марказлари, кўплаб майда бизнеслар даромадсиз қолгани сабабли миллионлаб ходимларини ишдан бўшатишига тўғри келган.

Охирги ҳафтанинг ўзида ноозиқ-овқат маҳсулотларининг чакана савдоси 2019 йилнинг шу даврига нисбатан 97 фоизга қисқариб кетган.

Аэропортларда йўловчилар оқими 95 фоизга, меҳмонхоналар даромадлари эса 80 фоизга камайиб кетган.

Тайёрлаган Шуҳрат Раҳимов

#АҚШ #ишсизлик

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.