Ўзбекистоннинг Сеулдаги элчихонаси Кореядан инсонпарварлик ёрдами жалб қилди

Коронавирус инфекциясига қарши кураш, шунингдек, унинг мамлакатда тарқалишининг олдини олишга қаратилган халқаро ҳамкорлик доирасида Ўзбекистон Республикасининг Сеулдаги элчихонаси Корея Республикасидан инсонпарварлик ёрдамини жалб қилди.

Фото: «Дунё» АА

Умумий оғирлиги 34 тоннага яқин инсонпарварлик ёрдами Ўзбекистон Республикаси Соғлиқни сақлаш вазирлиги эҳтиёжларидан келиб чиққан ҳолда, Жанубий Кореянинг «Evergreen Motors», «Hanshin E&C», «Shindong Resources», «BOMI E&C», «GM Korea», GM, «UNICO Logistics», «Chung Hospital», «Myung Sung Placon», «Suwan TPL», «Union Korea Pharm», «Century», «Infinity Co., Ltd.», «LH», «Hyundai Engineering» каби компаниялари ва Шинхан университети кўмагида шакллантирилди.

«Дунё» АА хабарига кўра, Корея Республикаси Ташқи ишлар вазирлиги томонидан ажратилган 250 минг доллар миқдоридаги маблағ эвазига «PCL Inc.» компаниясининг 20 минг дона ПЦР диагностика тест тизимлари харид қилинди.

Қиймати 900 минг долларга яқин 6,2 тонна оғирликдаги юқори технологик тиббий ускуналар, автомат механизмли тиббий каравотлар ва ПЦР диагностика тест тизимлари “Uzbekistan Airways” авиакомпаниясининг махсус самолётида мамлакатга жўнатилди.

Умумий оғирлиги 27,6 тоннадан ортиқ бўлган гуманитар юкнинг қолган қисми навбатдаги юк чартер рейси билан республикага етказилиши айтилган.

Корё университети профессори Юн Синг Жу ҳам касалликка қарши курашда халқаро эксперт сифатида ушбу рейс билан Тошкентга келади.

Корея Республикасининг ёрдам юки Тошкентга 26 апрель куни кечки пайт етиб келган.