Қорақалпоғистон Республикаси ва Тошкент вилоятида божхоначиларда вирус аниқланди

Соғлиқни сақлаш вазирлиги яна 16 кишига коронавирусдан зарарланиш ташхиси қўйилгани тўғрисида хабар берди.

«2020 йил 25 май соат 10:00 ҳолатига кўра, Ўзбекистонда коронавирус инфекцияси қайд этилганлар сони 3180 нафарни ташкил этмоқда», дейилади вазирлик хабарида.

Маълум қилинишича, янги касалланиш ҳолатларининг 4таси Қорақалпоғистон Республикасида аниқланиб, хориждан келган 3 нафар халқаро юк ташувчи автомобил ҳайдовчисига (улардан 2 нафари украиналик) ва чегара божхона пости ходимларидан 1 нафарига вирусдан зарарланиш ташхиси қўйилган.

5 ҳолат эса Самарқанд вилоятида қайд этилган. Янги беморларнинг 4 нафари касалликка чалинганлар билан мулоқотда бўлиб юқтирган, 1 нафари аҳоли орасидан аниқланган. Ҳозирда эпидемиологик суриштирув ишлари олиб борилмоқда.

Яна 1 нафар Тошкент вилоятида чегара божхона пости ходимида аниқланган.

Қолган 6 ҳолат карантин марказидаги фуқаролар орасида қайд этилган.

24 май куни Ўзбекистонда жами 49та янги зарарланиш ҳолати қайд этилди ва 33 бемор тузалди.
Шу вақтгача 2565 киши соғайган, айни вақтда шифохоналарда 602 бемор даволанмоқда. 3 нафар беморнинг аҳволи оғир.

Тайёрлаган: Азиз Қаршиев

#коронавирус