Вашингтонда икки кунлик комендантлик соати жорий этилади

АҚШ пойтахтида душанба куни маҳаллий вақт билан соат 19:00дан бошлаб (Тошкент вақти билан сешанба 04:00) икки кунга комендантлик соати жорий этилади.   

Бу ҳақда Вашингтон мэри Мюриэл Боузер маълум қилди.

"Бугун Колумбия округи, Вашингтонда янги комендантлик соати жорий этилиши тўғрисида фармойиш бераман. Комендантлик соати 19дан бошланади ва икки кун давом этади", - деди у.

Миннеаполисда афроамерикалик Жорж Флойднинг ўлимидан сўнг бошланган тартибсизликлар сабабли АҚШ пойтахтида якшанба куни душанба соат 06:00га қадар комендантлик соати жорий этилганди.  

Жорж Флойд сохта пулдан фойдаланганликда гумонланиб қўлга олинганди. Полициячилардан бири Дерек Шовин Флойд нафас ололмай қолганини айтишига қарамасдан, унинг бўйнини тиззаси билан босиб турган.

Бу ҳолат тасвирланган лавҳа интернетда тарқалди.

Флойд бир неча соатдан кейин касалхонада вафот этди.

Намойишлар Миннеаполисда бошланди ва тартибсизликларга айланиб кетди. Бошқа шаҳарларда дастлаб тинч намойишлар бўлиб ўтаётганди, аммо кейин уларда ҳам тартибсизликлар бошланди.

Норозиликлар боис 40га яқин шаҳарда комендантлик соати жорий этилди.