Самарқанд шаҳрида карантин вақтида ҳам тунги клублар ишлаётгани маълум бўлди

12 июнь куни Самарқанд шаҳрида ИИБ тезкор ходимлари кафе, бар ва тунги клублар назорати бўйича тунги рейд тадбирларини ўтказган. Рейд давомида Самарқанд шаҳри Нодирабегим кўчасида жойлашган тунги клуб ва бильярдхона кўздан кечирилганда, улар карантин қоидаларини қўпол равишда бузиб, яширинча фаолият кўрсатаётгани аниқланган.

Ярим кечаси бўлганига қарамай, бильярдхонада уч нафар, тунги клубда ўн нафар фуқаро борлиги аниқланган. Ушбу фуқаролар Самарқанд шаҳри ИИО ФМБ 5-сонли ички ишлар бўлимига олиб борилиб шахсига аниқлик киритилган. Уларга нисбатан маъмурий жавобгарлик тўғрисидаги қонуннинг тегишли моддаларига асосан баённома расмийлаштирилган.

Маълумот учун, Самарқанд шаҳри 8 июнь куни «сариқ» тоифага ўтказилганди. 10 июндан эса шаҳарда жамоат транспорти фаолияти тикланган.

Kun.uz мухбирининг хабар қилишича, Самарқандда карантин қоидаларига беписанд фуқаролар жуда кўп учрамоқда. Хусусан, йўловчи ташиш лицензиясига эга бўлмаган машиналар белгиланган миқдордан (2 киши) ортиқ одам ташишда давом этмоқда.

Шаҳарда автобус йўналишларининг барчаси фаолиятини тикламагани учун одамлар лицензияли ва лицензиясиз таксилар хизматидан фойдаланишга мажбур бўлмоқда. Ҳар икки турдаги таксилар одамларни шаҳар унчалик катта эмаслигига қарамай, киши бошига 10 минг сўмдан ташимоқда.