«Барселона» Пьянич трансферини эълон қилди ва Артурнинг кетишини тасдиқлади

«Барселона» ва «Ювентус» клублари ўзаро футболчи алмашишди.

«Ювентус» яримҳимоячиси Миралем Пьянич «Барселона»га ўтди. Каталонияликлар босниялик футболчининг трансфери учун 60 млн евро тўлашади. Шунингдек, яна 5 млн евро бонуслар кўринишида бўлади. «Барселона» Миралем билан 4 йиллик шартнома имзолади. Унинг товон пули 400 млн евро қилиб белгиланди.

Пьянич 2016 йилдан бери «Ювентус» шарафини ҳимоя қиляпти. 30 ёшли футболчи бу мавсумда барча мусобақаларда 36та ўйинда майдонга тушиб, 3та гол урган ва 4та голга ҳаммуаллифлик қилган.

Шунингдек, «Барселона» яримҳимоячиси Артур фаолиятини Италияда давом эттирадиган бўлди.

«Ювентус» бразилиялик футболчи учун 72 млн евро тўлайди. Шунингдек, яна 10 млн евро бонуслар кўринишида бўлади. Туринликлар Артур билан 5 йиллик шартнома имзоладилар.

Бу мавсумда футболчи «Барселона» таркибида барча мусобақаларда 28та ўйинда майдонга тушиб, 4та гол урган ва шунча голга ҳаммуаллифлик қилган.