Трампнинг маслаҳатчисида коронавирус аниқланди

Унда коронавирус Жанубий Дакотада, Трамп иштирокидаги тадбир олдидан аниқланган.

Фото: Bryan Woolston / Reuters

АҚШ президенти Дональд Трампнинг сайловолди кампанияси учун маблағлар йиғишга масъул маслаҳатчиси Кимберли Гилфойл коронавирусга чалинди. Бу ҳақда Трампнинг сайловолди штаби молиявий қўмитаси раҳбари Серхио Горга таяниб CNN хабар берди.

«Тест натижаси мусбат чиққанидан кейин Кимберли зудлик билан изоляция қилинди. У ўзини яхши ҳис қилмоқда ва ташхисни тасдиқлаш учун яна бир марта текширувдан ўтади», — деди Гор.

Унда коронавирус Жанубий Дакотада, Трамп иштирокидаги тадбир олдидан аниқланган, деб ёзади CNN ўз манбасига таяниб.

Яна бир манбанинг айтишича, Гилфойл охирги вақтларда президент билан мулоқотда бўлмаган, аммо июнь охирида Трамп иштирокидаги тадбирларда қатнашган.

АҚШ COVID-19 юқтириш ҳолатлари бўйича дунёда биринчи ўринда турибди. Жонс Ҳопкинс университети маълумотларига кўра, мамлакатда 2,7 млн киши ушбу касалликка чалинган, 129,4 минг киши вафот этган.

Тайёрлаган: Дилшод Аскаров

#АҚШ #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.