Трамп АҚШ мустақиллиги кунида радикаллар устидан ғалаба қозонишга ваъда берди

АҚШ президенти Дональд Трамп АҚШ мустақиллигининг 244 йиллиги муносабати билан 4 июлда миллатга мурожаат қилиб, АҚШ эркинликларга ва барча одамлар учун тенг имкониятларга амал қилишда бутун дунёга ўрнак бўлиб қолаётганини айтди.

“Бизнинг асосчи оталар зулмкорлик ва монархияга қарши курашда озодлик ва демократияни қўллаб-қувватлаган тажрибани бошлашган. 244 йилдан кейин Мустақиллик декларациясида баён қилинган тамойиллар ҳамон миллатимизни олға йўналтирмоқда ва унинг озодлик, фаровонлик ва барча учун имкониятлар маёғи сифатидаги нуфузини сақлаб келмоқда”, деб таъкидлаб ўтган Трамп.

АҚШ президенти охирги ойларда “Америка кўплаб синовлар ва чақириқларни бошдан кечиришига тўғри келганини”, бироқ шунга қарамай, АҚШ бир нечта тантанавор онларни бошдан кечирганини айтган.   

У ўтмишда “америкалик қаҳрамонлар” коммунистлар ва фашистлар устидан ғалаба қозонганини, “террорчиларни ернинг чеккасигача таъқиб қилганини”, ҳозирда эса мамлакат тартибсизликлар уюштираётган ва “нима қилаётганини ўзи англамаётган” сўл радикаллар, анархиячилар, марксчилар, мародёрларни йўқ қилиш жараёнини босиб ўтаётганини ва улар устидан ғалаба қилишини айтган.

“Биз дарғазаб оломонга ҳайкалларимизни ағдаришга, тарихимизни ўчиришга, фарзандларимиз онгини заҳарлашга ва эркинликларимизни поймол қилишга йўл бермаймиз”, деб айтган Трамп. Унинг таъкидлашича, намойишчиларнинг асл мақсади “адолат қарор топиши” эмас. 

Бир кун аввал Трамп Рашмор тоғидаги ёдгорликдаги нутқида АҚШ “тарихни йўқ қилиш, қадриятларни ёддан ўчириш ва миллий қаҳрамонларни ёмонотлиқ қилиш бўйича шафқатсиз кампания” гувоҳи бўлганини айтган. Унинг таъкидлашича, “сўл фашизм” тарафдорлари шу тариқа “Американи йўқ қилмоқчи”.

Трамп ўз мурожаатининг охирида ҳар бир америкаликка мустақиллик кунини яхши ўтказишни тилаб қолган.

“Биринчи хоним ва мен ҳар бир америкаликка бахтли ва хайрли 4 июлни тилаб қоламиз ва буюк давлатимиз туғилган кунини нишонлашда фахр ила сизга қўшиламиз. Тангри АҚШни ярлақасин”, деб ўз нутқини ниҳоялаган Трамп.