Путин Хабаровскнинг ҳибсга олинган губернатори ўрнига янги раҳбар тайинлади

Россия либерал демократик партияси депутати, Москва мэрлигига собиқ номзод Михаил Дегтярёв Хабаровск ўлкаси губернаторлигини вақтинча бажарувчи этиб тайинланди. Мамлакат президенти Владимир Путин бу ҳақда тегишли фармойиш имзолади.

Ҳужжатда кўрсатилишича, ҳудуднинг ҳибсга олинган губернатори Сергей Фургал ишончни йўқотганлиги учун лавозимидан четлатилган.

Путин видеоанжуман кўринишида ўтган суҳбат чоғида унга ушбу лавозимни таклиф қилган. Дегтярёв Хабаровск ўлкасига зудлик билан учиб кетишга тайёрлигини билдирган.

Июл ўрталарида Думанинг экология ва атроф-муҳитни ҳимоя қилиш бўйича қўмитаси раиси ўринбосари, ЛДПР депутати Кирилл Черкасов Дегтярёвни Фургал ўрнига тайинланувчилар қаторига киритганди. Эҳтимолий номзодлар орасида ундан ташқари Думанинг иқтисодиёт ва тадбиркорлик бўйича қўмитаси раиси Сергей Жигарев ва ЛДПР депутати Андрей Андрейченколар бор эди.

Михаил Дегтярёв 39 ёшда. 2011 йилдан буён ЛДПРдан давлат Думасига депутат ҳисобланади. Дегтярёв шов-шувли ташаббуслар муаллифи сифатида танилган. Хусусан, у 2013 йилда Россияда долларни тақиқлашни таклиф қилганди (қонун лойиҳасини кейинчалик қайтариб олган). Беш йилдан кейин эса АҚШнинг Москвадаги элчихонаси почта манзилини Шимолий Америка боши брек кўчаси, 1-уй деб ўзгартиришни таклиф қилган.

Дегтярёв Москва мэрлигига сайловларда икки марта қатнашган. 2013 йилда атиги 2,86 фоиз овоз олган. 2018 йилги сайловларда эса 6 фоиз овоз олган.

Хабаровскнинг эндиликда собиқ губернатори Сергей Фургал 9 июль куни қўлга олинди. Унга қотилликка уриниш ва 2004-2005 йилларда тадбиркорларнинг ўлдирилишини ташкиллаштириш айбловлари қўйилган.

Губернатор қўлга олинган кундан Хабаровскда уни қўллаб-қувватловчи намойишлар бошланиб кетди. Ўн кундан буён давом этаётган намойишларда ўн минглаб кишилар қатнашмоқда, улар Фургалнинг озод этилишини талаб қилмоқда.