Москваликларга бепул вакцина ваъда қилинди

Бу ҳақда шаҳар мэри Сергей Собянин «Россия 1» телеканали эфирида гапирди.

«Вакцина ишлаб чиқилиши билан эмлаш кампаниясини бошлаймиз. Вакцинация бепул бўлади. Бутун амбулатор-поликлиника тизими вакцинация учун хизмат қилади», — деди Собянин.

Унинг сўзларига кўра, куз фасли келиши ва грипп билан касалланиш ҳолатлари ошиши билан янада оғир бўлиши мумкин.

«Албатта, бу йил гриппга қарши эмлашни ҳам кучайтириш лозим бўлади. Чунки бирданига 2та эпидемиянинг – грипп ва коронавируснинг авж олишига йўл қўймаслик лозим. Бу жуда муҳим. Мураккаб ҳажмли иш, унга тайёргарлик кўряпмиз», - деди мэр.

Ҳозирги вақтда Москва поликлиникаларида коронавирусга қарши бурун ва томоқдан олинадиган суртма тестини ва антитана учун томирдан олинадиган қон тестини бепул топшириш мумкин.

Россияда коронавирусга қарши тестни ишлаб чиқиш билан 3та муассаса шуғулланмоқда – Новосибирскдаги «Вектор» вирусология илмий маркази, Санкт-Петербургдаги вакцина ва зардоб институти, Москвадаги Н.Ф.Гамалея номли марказ. Вакцина ишлаб чиқилганидан сўнг уни дастлаб коронавирус юқтириб олганлар билан ишловчи ва хатарли гуруҳга кирувчи тиббий ходимлар олишади.