Германияда Тожикистон фуқароси терроризмда гумонланиб қўлга олинди

Албания Германия федерал прокуратураси сўровига кўра терроризмда гумонланган Тожикистон фуқароси Комрон Б.ни экстрадиция қилди. У Франкфурт-Майн аэропортида ҳибсга олинди.

Қайд этилишича, у ИШИД террорчи гуруҳининг бошқа аъзолари билан террорчилик гуруҳини ташкил қилган. Унинг шериклари деб тахмин қилинган беш киши апрелда қўлга олинган, июлда уларга айблов эълон қилинганди. Комрон Б. 29 апрелда Албанияда ушланганди.

Ҳибсга олиш учун ордерда кўрсатилишича, Комрон Б. ва унинг шериклари 2019 йил январда ИШИД аъзоларига айланган. Улар дастлаб Тожикистонда ҳукуматга қарши уруш қилишни режалаштирган, аммо кейин фикридан қайтиб, Германияда терактлар уюштиришга қарор қилишган.

Улар ИШИДнинг Сурия ва Афғонистондаги етакчилари билан мунтазам алоқада бўлган ва топшириқлар олган. АҚШнинг Германиядаги ҳарбий хизматчилари ва фуқаролари терактлар нишонига айланиши лозим бўлган. 

 Тергов маълумотларига кўра, улар бу режаларини амалга ошириш учун ўқотар қуроллар ва ўқ-дориларга эга бўлишган. Бундан ташқари, улардан қўлбола портловчи ва ёнувчи қурилмаларни ясаш бўйича қўлланмалар топилган.

Германия полицияси апрелда ФРГ ҳудудида терактлар содир этишни режалаштирган тожикистонликларни қўлга олганини хабар қилганди.