Обама Трампни 170 мингдан кўпроқ америкаликнинг коронавирусдан ўлишида айблади

АҚШнинг собиқ президенти Барак Обама 170 мингдан кўпроқ америкаликнинг коронавирусдан вафот этиши учун жавобгарлик амалдаги президент Дональд Трамп зиммасида ётишини айтди. Обама, шунингдек, Трампнинг президентлигини реалити-шоуга қиёслаган.

Фото: Reuters

Собиқ президент бу ҳақда АҚШ Демократик партияси қурултойидаги нутқи давомида айтиб ўтган.

“Дональд Трамп бу лавозим учун ҳали ўсиб етмаган, чунки у буни эплай олмайди. Унинг бу лавозимдаги муваффақиятсизликларининг оқибатлари жиддий бўлиб, 170 минг америкалик вафот этди. Миллионлаб иш ўринлари йўқотилди. Энг ёмон томонларимиз намоён бўлди, обрўимиз ва қадр-қимматимиз бутун дунёда кучли жабр кўрди, демократик институтларимиз эса ҳар қачонгидан кўра кўпроқ хавф остида қолди”, деб таъкидлаб ўтган Обама ўз нутқида.

Обаманинг таъкидлашича, амалдаги президентга ўз шахсига қизиқишни ушлаб туриш, ҳамиша омма эътиборини тортиш муҳимроқдир.

“Трамп на ишга қизиқиш билдирган, на ўз ваколатларидан ўзи ва дўстларидан бўлак бошқа кимгадир ёрдам бериш учун фойдаланган”, деб қўшимча қилган собиқ президент.

Собиқ президент ноябрдаги президент сайловларида демократлардан номзод бўладиган Жо Байден қўллаб-қувватловига унинг афзал томонларини санаб ўтган ва уни “ҳаммадан яхши” деб атаган. Унинг таъкидлашича, Байден АҚШдаги “алғов-далғов, нотинч замон”га чек қўя олади.

“У туфайли мен президент сифатида яхшироқ бўлдим. Унда мамлакатимизни яхшироқ қилиш учун тажриба ва ирода бор”, деб айтган Обама. Байден Обама билан 8 йил вице-президент сифатида ишлаган.

Ўз навбатида Трамп Обаманинг ушбу нутқига изоҳ бериб ўтди. “Менга аввалги ҳаётим жуда ёқарди. Мен аввал бу ерда Обама ва Жо Байден ишлагани учун шу ердаман. Агар улар ўз ишини яхши эплай олганда, мен бу ерда бўлмасдим. Эҳтимол, сайловларда ҳам иштирок этмаган бўлардим. Обама бу ерда бизга расво ҳолатни мерос қилиб қолдирган, у тузган битимлар эса аҳмоқона бўлган”, деб айтган Трамп.

АҚШ Демократик партиясининг сайловолди қурултойи 17 августдан 20 августгача виртуал режимда бўлиб ўтмоқда. Делегатлар Жо Байденни президент сайловлари учун номзод сифатида тасдиқлаб бўлишди. Шунингдек, бу вақт ичида улар партиянинг сайловолди дастурини тасдиқлашлари керак бўлади. Қурултойда Барак Обамадан ташқари, АҚШнинг собиқ биринчи хоними Мишель Обама, Нью-Йорк губернатори Энди Куомо, Байденнинг праймериз бўйича рақиби, сенатор Берни Сандерс, АҚШнинг собиқ давлат котиби ва биринчи хоними Хиллари Клинтон сўз олган.