Калифорния йирик ўрмон ёнғинлари туфайли бошқа давлатлардан ёрдам сўради

АҚШнинг Калифорния штати йирик ўрмон ёнғинлари туфайли ташқаридан ёрдам сўради. Калифорния губернатори Гейвин Ньюсом кўмак беришни сўраб Канада, Австралия ҳамда АҚШнинг бошқа штатларига мурожаат қилди.  

Ҳозирда Калифорнияда 3000 квадрат километрдан ортиқ майдонда 560дан ортиқ йирик ёнғинлар вужудга келган. Ёнғинларга қарши курашга 12 мингдан ортиқ ўт ўчирувчилар жалб этилган.

Хабар қилинишича, ёнғин оқибатида камида беш киши ҳалок бўлган. Штатнинг қарийб 120 минг аҳолиси уйларини тарк этишга мажбур бўлган. Улар уйларига бир неча ҳафта давомида қайта олишмайди.

Вазият коронавирус эпидемияси сабабли янада оғирлашган. Бошпаналар тўлиб-тошган бўлиб, кўпчилик у ерда туришни истамаяпти.

Калифорния АҚШнинг коронавирусдан энг кўп жабр кўрган штатларидан бири ҳисобланади. Охирги маълумотларга кўра, бу ерда касаллик юқтириш билан боғлиқ 650 мингдан ортиқ ҳолат қайд этилган, 12 минг киши вафот этган.