Магистратурага кириш имтиҳонлари 8-20 сентябрь кунлари ўтказилади

2020/2021 ўқув йили қабулида республика олий таълим муассасаларининг магистратурасига кириш имтиҳонлари карантин талабларига қатъий риоя қилинган ҳолда 2020 йил 8-20 сентябрь кунлари ўтказилади. 

Олий ва ўрта махсус таълим вазирлиги хабарига кўра, бу Ўзбекистон Республикаси таълим муассасаларига ўқишга қабул қилиш бўйича Давлат комиссиясининг 3-сон мажлиси баёни қарорида белгилаб қўйилди.

Қайд этилишича, имтиҳонлар тест синови тарзида компьютерда онлайн олинади.

Эслатиб ўтамиз, жорий ўқув йилида таълимнинг магистратура босқичига республика бўйича жами 10 425 нафар талаба қабул қилиниши белгиланган.

Шундан 5475 нафари грант, 4950 нафари тўлов-контракт асосида таҳсил олади.