AstraZeneca британ-швед фармацевтика компанияси коронавирусга қарши вакцинасининг АҚШдаги 3-босқич синовларини беморлардан бирида иккиламчи таъсир пайдо бўлгани сабабли тўхтатди. Бу ҳақда компания вакилларига таяниб Stat нашри хабар берди.
Нашр вакцина қабул қилишдан кўнгиллида айнан қандай таъсир пайдо бўлганига аниқлик киритмаган, бироқ ҳозирда мутахассислар олдида бунинг сабабини аниқлаш вазифаси турибди.
Аввалроқ АҚШ президенти Дональд Трамп коронавирусга қарши вакцина йил охиригача ёки ундан ҳам эртароқ пайдо бўлиши мумкинлигини айтганди. AstraZeneca вакцинани Оксфорд университети олимлари билан биргаликда ишлаб чиқмоқда. Вакцина август охирида 30 минг америкаликда синала бошланганди.
АҚШ ҳукумати вакцина ишлаб чиқилишига қўшимча маблағлар йўналтирганди. AstraZeneca бу мақсадда 1,2 млрд доллар олган. Шунингдек, вакцинани яратиш устида Moderna, Merck ва Pfizer, Johnson & Johnson компаниялари иш олиб бормоқда. Оқ уй маълумотларига кўра, АҚШ маъмурияти ушбу лойиҳаларга умумий ҳисобда 12 млрд доллар сармоя киритган.
