Олимлар Нипах вирусига қарши вакцина ишлаб чиқишди

Белгияда Токио университети олимлари томонидан Нипах вирусига қарши ишлаб чиқилган вакцинанинг илк клиник синовлари бошланади. Синовлар одамларда ўтказилади, деб хабар берди Nikkei нашри.

Қайд этилишича, приматларда ўтказилган синовларда вакцина юз фоизлик натижа кўрсатган.

Олимлар келгусида Бангладешдаги катталар ва болалар иштирокида тадқиқотларни кенгайтиришни режалаштирмоқда.

Аввалроқ Ҳиндистоннинг Калкутта шаҳри яқинида ўлимга олиб келиши мумкин бўлган Нипах вируси тарқалаётгани хабар қилинганди.

Вирус ҳайвонлардан, шунингдек зарарланган озиқ-овқат ёки инсондан инсонга юқиши мумкин.

Жаҳон соғлиқни сақлаш ташкилоти маълумотига кўра, вирус юқтиришдан ўлим даражаси 40% дан 75% гача бўлиб, бу эпидназорат сифати ва маҳаллий соғлиқни сақлаш тизими имкониятларига боғлиқ.