Грецияда 12 мингдан кўпроқ мигрант яшаган лагерь ёниб кетди

Грециянинг Лесбос оролидаги энг йирик мигрантлар лагери Морияда катта кўламли ёнғин чиқди. Лагерда коронавирусга чалинганлар ҳам бўлган. 

Маълум қилинишича, лагердаги одамлар эвакуация қилинган. Чодирлар ва контейнерлар ёниб кетишига сабаб бўлган ёнғин нима туфайли юз бергани ҳозирча номаълум. Жабрланганлар ва қурбонлар ҳақида маълумот берилмаган.

Мория лагерида белгилангандан 4 марта кўпроқ - 12 мингдан ортиқроқ мигрант яшаган. Лагерь ёмон шароитлари туфайли инсонпарварлик ташкилотлари томонидан танқид қилиб келинган. Ўтган ҳафта объект мигрантлардан бирида коронавирус аниқлангандан кейин карантинга олинган. Айни вақтга келиб лагерда коронавирусга чалинганлар сони 35 нафарга етган.

Лесбос губернатори ўринбосари Арис Хатзикомниноснинг маҳаллий радиога маълум қилишича, лагерь буткул вайрон бўлган.

Маҳаллий фуқаролардан бирининг маълум қилишича, деярли бутун лагерь олов исканжасида қолган. Бироқ шунга қарамай, бир нечта чодирга талафот етмаган.