Чехия ва Австрияда коронавируснинг иккинчи тўлқини бошлангани эълон қилинди

Чехия ва Австрияда коронавируснинг иккинчи тўлқини бошлангани эълон қилинди. 

Шу сабабли Чехиядаги шифохоналар қуввати оғир аломатларга эга касалларни қабул қилиш учун етарлича бўлмаслиги мумкин. Бу ҳақда Чехиянинг бош эпидемиологи Роман Примула маълум қилди. 

“Пандемиянинг иккинчи тўлқини бошланди”, деб айтган Примула. У касалланганлар сонининг жадал ўсишини тўхтатиш ва шифохоналарда ўринлар етишмаслиги муаммосидан қочиш учун барча саъй-ҳаракатларни сафарбар қилиш лозимлигини таъкидлаб ўтган. 

Айни вақтда Чехияда коронавирусга чалинганлар сони 35 мингдан кўпроқни, ундан вафот этганлар сони 456 нафарни ташкил қилмоқда. Сўнгги суткада касалланганлар сони 1541 нафарга ошган.

Шунингдек, Австрияда ҳам пандемиянинг иккинчи тўлқини кузатилмоқда. Мамлакатда коронавируснинг иккинчи тўлқини бошланганини канцлер Себастьян Курц эълон қилган.

“2 ҳафта олдин кунига 350 та янги ҳолат қайд этилган бўлса, кеча 850дан кўпроқ бўлди. Айниқса, Венада оғир вазият кечмоқда. Бу ерда Австриядаги барча касалланганларнинг ярми қайд этилган. Биз яқинда кунига мингта янги касалланиш қайд этиладиган кўрсаткичга етиб келамиз”, деб айтган Курц ва куз-қиш мавсуми оғир келишидан огоҳлантирган.

Шу муносабат билан канцлер Австрия аҳолисини инфекция тарқалиши олдини олишга қаратилган барча чораларга амал қилишга чақирган. “Ҳозирда биз келаётган ойлардаги синовларни баҳорда кўрсатган интизом ва эътиборлилик билан енгиб ўтишимиз лозим”, деб таъкидлаб ўтган канцлер.

Айни вақтда Австрияда коронавирусдан касалланиш ҳолатлари 33 мингдан кўпроқни, вафот этганлар сони 756 нафарни ташкил қилмоқда.