Ўзбекистон «Ғузор – Регар» электр узатиш тармоғини тиклаш ишларини бошлади

Энергетика ва сув ресурслари мувозанатини сақлаш, истеъмолчиларни электр энергияси билан барқарор таъминлаш борасида Тожикистон Республикаси билан ҳамкорликда бир қатор инвестицион лойиҳалар амалга оширилмоқда.

Энергетика вазирлиги матбуот хизматининг хабар беришича, «Ўзбекистон миллий электр тармоқлари» АЖ томонидан «Ўзбекистон Республикасида 500 кВ.ли «Ғузор – Регар» (Л-507) электр узатиш тармоғини тиклаш» инвестицион лойиҳаси амалга оширилмоқда.

Лойиҳа доирасида 500 кВ.ли «Ғузор – Регар» (Л-507) электр узатиш тармоғининг Ўзбекистон ҳудудидаги 63 километр узунликдаги қисми қайта қурилади. Лойиҳанинг дастлабки қиймати 25 миллион АҚШ долларни ташкил этади.

Халқаро тендер танловлари натижаларига кўра, Хитойнинг Shanghai Electric Power Transmission & Distribution компанияси ғолиб деб топилди ва мазкур инвестицион лойиҳа ушбу компания билан ҳамкорликда амалга оширилади.

Лойиҳа Тожикистон ва Ўзбекистон ўртасидаги савдо-иқтисодий ҳамкорлик бўйича ҳукуматлараро комиссияси баённомаси асосида амалга оширилмоқда. Лойиҳа Ўзбекистон ва Тожикистон энергия тизимларининг параллель ишлаши вақтида электр энергияси ишончлилигини таъминлашга хизмат қилади, дейилади хабарда.