Филадельфияда афроамерикаликнинг ўлимидан сўнг тартибсизликлар юз берди

Полиция тартибсизликлар юз берган ҳудуд яқинидаги еттита район аҳолисига кўчага чиқмасликни тавсия қилди.

Фото: AP Photo/Matt Slocum

АҚШнинг Филадельфия шаҳрида афроамерикалик Уолтер Уоллеснинг ўлимидан сўнг юз берган тартибсизликлар давомида мингга яқин киши дўконларни талаб кетди. Бу ҳақда шаҳар полиция бошқармаси хабар берди.

"Мингга яқин кишидан иборат оломон Араминго-авеню ва Кастор-авеню районларидаги хусусий корхоналарни талади", - дейилади хабарда.

Полиция тартибсизликлар юз берган ҳудуд яқинидаги еттита район аҳолисига кўчага чиқмасликни тавсия қилди.

Fox News телеканалининг хабар қилишича, талончилар Walmart, Burlington Coat, Target ва Dollar General тармоқлари дўконларига ҳужум уюштирган. Улар дўконлардан таланган буюмларни автомобиллари юкхонасига жойлаб, кўздан ғойиб бўлган.

26 октябрь куни ёнида пичоғи бор деб гумон қилинган Уолтер Уоллес полициячилар томонидан бир неча бор огоҳлантиришлардан сўнг отиб ўлдирилганди. Шундан сўнг Филадельфияда бошланган норозилик намойишлари тартибсизликларга айланиб кетган.

Филадельфия полицияси бошлиғи Даниэль Аутлонинг маълум қилишича, тунда содир этилган тартибсизликлар вақтида 30 нафар полиция ходими жароҳатланган, 91 киши қўлга олинган.