Солиқ органларининг ютуқли чек ўйинлари барча ҳудудларда амал қилади

Давлат солиқ қўмитаси ютуқли чек ўйинлари 2020 йил 29 октябрдан бошлаб республиканинг барча ҳудудларини қамраб олади.

Фото: Давлат солиқ қўмитаси

Ўзбекистон президенти Шавкат Мирзиёевнинг тегишли фармони билан, Давлат солиқ қўмитаси томонидан 2020 йилда Тошкент шаҳрида синов тариқасида жорий этилган ютуқли чек ўйинларининг муваффақияти сабаб ушбу акция кўлами янада кенгаяди.

Таъкидланишича, истеъмолчилар ютуқли чек ўйинларининг навбатдаги – V тиражида иштирок этиш учун республиканинг исталган ҳудудида онлайн назорат касса машинаси ёки виртуал касса чекини олиб рўйхатдан ўтказиши мумкин.

«Асосий шарт – ҳар бир истеъмолчи битта савдо шохобчасидан бир кунда фақат иккита, харид миқдори 1000 (минг) сўмдан кам бўлмаган чекни рўйхатдан ўтказиши мумкин. Эслатиб ўтамиз, ютуқли чек ўйинларида иштирок этиш учун харид қилинган маҳсулот (хизмат) учун онлайн НКМ ёки виртуал кассанинг QR кодли чекини олиш лозим», — дейилади ДСҚ хабарида.

Маълум қилинишича, республикада қарийб 64 минг савдо шохобчасида шундай қурилмалар ўрнатилган.

«Кейинги қадам – чекнинг QR кодини SOLIQ мобил иловасида сканерлаш ёки 12 хонали фискал белгисини 1077 рақамига SMS тарзда юбориш лозим. Рўйхатдан ўтказиш муваффақиятли якунлангандан сўнг, Сиз ютуқли ўйин иштирокчисига айланасиз», — дея қўшимча қилинади қўмита хабарида.

Маълумот учун, Тошкент шаҳрида ўтказилган ютуқли чек ўйинларининг ҳар бир тиражида иштирокчилар сони ортиб бориб, ҳозиргача ўтказилган 4та тиражда онлайн НКМ ва виртуал кассалардан берилган қарийб 110 минг дона чек иштирок этди.