Tashkent City ҳудудида қурилаётган биноларнинг бирида қурилиш жиҳозлари сақланаётган 15 кв. метр майдонда ёнғин содир бўлди. Бу ҳақда Фавқулодда вазиятлар вазирлиги хабар қилди.
Қайд этилишича, бугун, 4 ноябрь куни, соат 15:37да Тошкент шаҳар ФВБ диспетчерлик хизматига Шайхонтоҳур тумани Фурқат кўчасида қурилиш ишлари олиб борилаётган Tashkent City’нинг 7-лотида 6 қаватли янги қурилаётган бино 3-қаватида ишчиларнинг вақтинча фойдаланаётган омборхонасида ёнғин содир бўлганлиги тўғрисида хабар келиб тушган.
Мазкур ҳолат юзасидан шаҳар ФВБ ёнғин ўчириш экипажи соат 15:42да воқеа жойига етиб бориб, ёнғин соат 15:52да тўлиқ бартараф этилган.
Ёнғин оқибатида 15 кв. метр майдонда усталарнинг қурилиш жиҳозлари зарар кўрган.
Ёнғиндан жароҳат олган ҳамда вафот этган фуқаролар йўқ, дейилади маълумотда.