Пандемияга қарши курашда бурилиш ясаши мумкин бўлган ой маълум қилинди

Жаҳон соғлиқни сақлаш ташкилоти коронавирус пандемияси билан боғлиқ вазият 2021 йил март ойида тубдан ўзгаришига умид билдирмоқда. Бу ҳақда ЖССТ бош директори маслаҳатчиси Брюс Эйлвард Женевада ўтаётган Жаҳон соғлиқни сақлаш ассамблеясининг 73-сессиясида айтиб ўтди.

Фото: Reuters

“Мартга келиб ҳозирда бутун дунё бўйлаб олиб борилаётган ишнинг натижаси сифатида пандемия билан боғлиқ жорий вазиятни тубдан ўзгартирадиган вазиятга келишимиз мумкин”, деб таъкидлаб ўтган Эйлвард.

Унинг таъкидлашича, бу вақтга келиб коронавирусга қарши кураш учун зарур бўлган барча ресурслар, жумладан инфекцияни даволашда қўлланаётган дексаметазон, ўпкани сунъий шамоллатиш қурилмалари, шахсий ҳимоя воситалари етарлича миқдорда бўлади. Бироқ ЖССТ бу вақтгача пайдо бўлишини кутаётган асосий нарса вакцина ҳисобланади.

Бундан ташқари, ЖССТ 2021 йил мартида коронавирусни мустақил аниқлаш учун тестлар пайдо бўлишини кутмоқда.

Тайёрлаган Шуҳрат Раҳимов

#вакцина #пандемия

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.