2014 йилда АҚШда ташкил топган Elation Hypercars компанияси 1900 от кучига эга Freedom электр гиперкарини намойиш қилди.
Янги гиперкар дизайнида Koenigsegg Jesko ва Chevrolet Corvette C8 Stingray моделларига хос жиҳатларни кўриш мумкин. Гиперкарнинг ушбу моделлардан фарқли жиҳати “қуш қаноти” кўринишидаги эшиклари ҳисобланади. Автомобил кузовида углепластик қўллангани гиперкарнинг енгилроқ чиқишига имкон берган. Автомобил оғирлиги 1650 кгни ташкил қилади.
Elation Freedom умумий қуввати, версиясига кўра, 1427 ёки 1903 от кучини ташкил қилувчи 3та электр мотор билан жиҳозланган. Машина жойидан 100 км/соат тезликка 1,8 сонияда эриша олади, максимал тезлиги эса 418 км/соат билан чекланган. Гиперкар бир қувватланишда 644 км йўл боса олади.
Машинанинг ишлаб чиқарилиши қачон бошланиши ва у қандай ҳажмда чиқарилиши ҳақида маълумот берилмаган. Шуниси маълумки, гиперкар харидорларга 2 млн долларга айланади. Мижозлар ўз хоҳишларига кўра машинанинг 5,2 литр ҳажм ва 750 от кучига эга бензинда ишловчи моторли версиясини буюртиришлари мумкин. Бироқ гиперкарнинг бундай модификацияси уларга 2,3 млн долларга айланади.
