АҚШ компанияси соатига 500 километр тезликка эриша оладиган гиперкарни тақдим этди

АҚШнинг Hennessey компанияси дунёдаги энг тезюрар автомобил номига даъвогарлик қилиши мумкин бўлган Venom F5 гиперкарини тақдим этди. Гиперкар бренднинг 30 йиллигига атаб яратилган.

Фото: Hennessey

Компанияда таъкидланишича, автомобил тезлиги 500 км/соатгача чиқиши мумкин. Бироқ автомобил бундай юқори тезликка махсус F5 режимида эриша олади. Пастроқ тезликлар учун яна 4та режим кўзда тутилган: Sport, Track, Drag ва Wet.

Орқа приводли, оғирлиги 1360 кг келувчи янги гиперкар 6,6 литрли, 8 цилиндрли бензин двигатели билан жиҳозланган. Автомобилнинг қуввати 1817 от кучини ташкил қилади. Автомобилда 7 поғонали роботлаштирилган узатмалар қутиси ўрнатилган.

Hennessey ҳаммаси бўлиб Venom F5’дан 24 дона ишлаб чиқаради. Машиналарнинг нархи 2,1 млндан бошланади. 12та машина америкалик харидорлар учун захиралаб қўйилган, қолган 12та машинани бошқа истовчилар сотиб олиши мумкин. Гиперкарлар 2021 йилдан харидорларга етказиб берила бошланади.

Hennessey Venom F5 ўз вақтида сайёрадаги энг кучли автомобил деб тан олинган ва 1244 от кучига эга Hennessey Venom GT’нинг издоши ҳисобланади.

Машинанинг 2 ўриндиқли салони карбон ва чарм билан қопланган. Гиперкарнинг жиҳозланиши ўз ичига 9 дюймли Alpine мултимедиа тизимини, карбон рулни ва 7 дюймли асбоблар панелини олган.