АҚШ Очиқ осмон ҳақидаги келишувдан чиқади

Келишув 1992 йил 24 март куни Европада хавфсизлик ва ҳамкорлик ташкилотига аъзо 27та давлат ўртасида тузилган. АҚШдан ташқари яна 33та давлат келишув иштирокчиси ҳисобланади. Келишув доирасида ушбу давлатлар бир-бирининг ҳудуди устидан кузатув парвозлари бажариши ҳамда фото ва видеосъёмка олиб бориши мумкин.

АҚШ президенти Дональд Трамп Вашингтоннинг келишувдан чиқиши ҳақида 21 майда эълон қилган.

Трамп бу қарорни Россия келишув шартларини бузгани билан тушунтирган. “Шу сабабли, улар шартларга амал қилмагунча, биз келишувдан чиқиб турамиз. Бироқ биз янги келишув тузишга эришишимизга ёки жорий келишувга қайтиш учун биргаликда бирор иш қилишга яхши имкониятга эгамиз”, деб айтган Трамп. 

AP ахборот агентлигининг АҚШ маъмурияти вакилларига таяниб ўшанда ёзишича, Вашингтоннинг норозилигига Россиянинг Москва, Чеченистон, Абхазия ва Жанубий Осетия ҳудуди устидан парвозларни чеклагани ҳамда Калининград устидан парвозлар ўтказиш қоидаларининг қатъийлаштирилгани сабаб бўлган. АҚШ давлат котиби Майк Помпеонинг айтишича, Москва келишувни “таҳдид қилиш ва қўрқитиш воситаси”га айлантириб олган. 

Россия ушбу айбловларни рад этган ва АҚШга нисбатан жавоб эътирозлари билдирган. “Мисол учун, АҚШ 2017 йилдан ушбу келишувни Россияга нисбатан бажариш бўйича ўз ёндашувларини қатъийлаштирган ва 2018 йил январдан мамлакатимизга нисбатан бир нечта чекловлар амал қила бошлаган”, деб таъкидлаб ўтган ўшанда Россия ташқи ишлар вазирлиги расмий вакили Мария Захарова. Унинг таъкидлашича, Вашингтон Ҳавайи ороллари устидан кузатув парвозлари ўтказиш қоидаларини ўзгартирган ва АҚШнинг қитъадаги қисмида тунги вақтни ўтказишга рухсат бермай қўйган.