Рим папаси мартда Ироққа ташриф буюради

Папанинг Ироққа ташрифи пандемия бошланганидан буён илк хориж сафари бўлади. Понтифик Иброҳим пайғамбар хотираси билан боғлиқ Бағдод ва Арбил шаҳарлари, шунингдек, насронийлар учун қадрли, аммо уруш туфайли хароб ҳолга келган Нинва текисликларидаги Мўсул ва Қорақош шаҳарларига ҳам бориши кўзда тутиляпти. Ироққа ташриф келаси йилнинг 5-8 март кунлари бўлади.

«Ташриф дастури жаҳондаги пандемик ҳолат ривожини ҳисобга олган ҳолда бўлади», деган Ватикан матбуот хизмати.

Ироқ ташқи ишлар вазири Рим папасининг ташрифи «тарихий воқеа бўлиб, Ироқнинг барча соҳалари учун ўзига хос қўллаб-қувватлаш бўлади», дея баёнот берган.

«Шунингдек, папанинг келиши, нафақат Ироқ, балки бутун ҳудуд учун тинчлик рамзи бўлиб, инсониятнинг экстремизм ва зиддиятларга қарши бирдамлигини акс эттиради ҳамда бағрикенглик ва турфа хилликни тарғиб қилади», дейилган вазирлик баёнотида.

Маълумот учун, Ироқ аҳолисининг 1 фоизга яқини насронийликнинг турли мазҳабларига эътиқод қилади.