Хитой компанияси Ўзбекистонда ёғ олинадиган ўсимликлар етиштирмоқчи

Ўзбекистоннинг Хитойдаги элчихонасида мамлакат иқтисодиётининг турли жабҳаларида, шу жумладан, қишлоқ хўжалиги соҳасида истиқболли сармоявий лойиҳалар амалга оширилиши жараёнига Хитой компанияларини жалб этишга қаратилган фаол саъй-ҳаракатлар олиб борилмоқда.

«Tianjin Hongli Agricultural Science and Technology Сo. Ltd.» аграр жабҳада инновация технологияларини ривожлантириш ва уларни қўллаш бўйича Хитойдаги етакчи компаниялардан бири ҳисобланади.

Элчихона кўмагида мазкур компания раҳбари Ван Синь ва «Ўзёғмойсаноат» уюшмаси бошқаруви раиси К. Серкаев ўртасида видеоконференция алоқаси воситасида ташкил этилган музокараларда мамлакатнинг сармоявий йўналишдаги ҳамда экспорт салоҳиятига алоҳида эътибор қаратилди.

Музокаралар якуни бўйича Ўзбекистонда ёғ олинадиган маданий ўсимликлар, жумладан, соя, кунгабоқар ва ўлкада ҳали таомилга кирмаган “йўлбарс ёнғоғи” (tiger nut) етиштиришни ташкил этиш юзасидан келишувга эришилди.

Музокаралар чоғида эришилган келишувни амалий жиҳатдан ҳаётга татбиқ этиш мақсадида яқин вақт оралиғида «Tianjin Hongli Agricultural Science and Technology Сo. Ltd.» компанияси вакиллари Ўзбекистонга келади.