АҚШ адлия вазирлиги Трамп тайинлаган федерал прокурорларни истеъфога чиқаради

Сешанба куни АҚШ адлия вазирлиги собиқ президент Доналд Трамп томонидан тайинланган федерал прокурорларнинг истеъфосини талаб қилиши мумкин. Бу ҳақда CNN телекомпанияси хабар бермоқда.

 Телекомпаниянинг маълумот беришича, истеъфо тўғрисидаги тегишли талабномалар 56 нафар прокурорга юборилади. Ушбу рўйхатга ҳозирда муҳим суриштирувлар олиб бораётган Делавэр штати прокурори Дэвид Вайс ва Коннектикут штати прокурори Жон Дарем киритилмайди.

 Қайд этилишича, адлия вазири вазифасини бажарувчи Монти Уилкинсон улар ҳозирча ўз лавозимларида қолишлари ҳақида ҳар иккисини хабардор қилган.

 Вайс АҚШ президенти Жо Байденнинг ўғли Хантерга нисбатан солиқ текширувлари ўтказилишини назорат қилмоқда. Дарем ўтган йилдан буён АҚШ махсус хизматлари Трампнинг сайловолди штабини кузатгани ҳолати бўйича текширув олиб бормоқда

 Адлия вазирлиги 56 нафар прокурор қачон истеъфога чиқиши борасида маълумот бермаган.

Ушбу амалиёт маъмурият алмашган пайтда юз берадиган одатий жараён ҳисобланади. Тўрт йил аввал Оқ уйга Трамп келганидан сўнг Барак Обама тайинлаган 46 нафар федерал прокурор истеъфога чиқарилганди.