АҚШ вакиллар палатаси 1,9 трлн долларлик "Американи қутқариш режаси"ни маъқуллади

Конгресс вакиллар палатаси АҚШ президенти Жо Байденнинг Америка иқтисодиётини қутқариш ва пандемия даврида аҳолига ёрдам бериш режасини маъқуллади. Режада ушбу мақсадлар учун 1,9 трлн доллар ажратиш кўзда тутилган.

Энди ушбу режани сенат кўриб чиқиши лозим. Агарда режа маъқулланса, у федерал ҳукуматнинг коронавирусга қарши курашиш бўйича олтинчи дастури бўлади.

Режага кўра, миллий вакцинация дастурини ривожлантириш, мактабларни хавфсиз тарзда очиш, кичик бизнесни қўллаб-қувватлаш, ишлаётган оилаларга 1,4 минг доллардан бериш, ишсизлик бўйича 400 доллар ҳафталик федерал устама тўлаш ва 3,6 минг долларгача болалар нафақасини беришга қарийб 2 трлн доллар сарфланади.

"Американи қутқариш режаси" энг кам иш ҳақи миқдорини соатига 7,25 доллардан 15 долларгача ошириш дастурини ўз ичига олади.

Байден "Американи қутқариш режаси"ни 20 январ куни эълон қилганди. Айрим иқтисодчилар ушбу чоралар пакетини жуда йирик деб ҳисоблашмоқда ва унинг қабул қилиниши иқтисодиётга зарар етказишидан хавотирланишмоқда.