Нигерияда жиноятчилар ҳужумидан кейин 30га яқин талаба бедарак йўқолди

Нигерия шимолидаги Кадуна штатида қуролланган жиноятчилар давлат коллежи ётоқхонасига ҳужум қилиб, у ердаги талабаларни ўғирлаб кетди. Охирги ойларда Нигерияда бундай ҳужумлар тез-тез содир этилмоқда.

Штат хавфсизлик ва ички ишлар вазири Самуэл Аруваннинг маълум қилишича, жиноятчилар ҳужумидан кейин 30га яқин талаба бедарак йўқолган. Шу билан бирга, ҳарбийлар жиноятчиларга қаршилик кўрсатиб, 180га яқин талабани қутқариб қолишган. Ҳозирда ҳукумат воқеа тафсилотлари ва йўқолган талабалар сони ҳамда улар қаердалигини аниқлаш билан шуғулланмоқда.

Аввалроқ “Би-би-си” телеканали гувоҳларга таяниб ўғирлаб кетилган талабалар сони 50га етиши мумкинлигини ва уларнинг барчаси қизлар эканини маълум қилган. Ҳукумат тақдим қилган маълумотларга кўра, коллежга ҳужум 11 март куни кечаси содир этилган.

Нигерияда охирги ойларда пул олиш мақсадида ўқувчиларни ўғирлаб кетиш ҳолатлари тез-тез учрамоқда. Жумладан, 26 февралда Замфара штатининг Жангебе шаҳрида жойлашган қизлар интернатидан 279 қиз ўғирлаб кетилганди. Улар музокаралардан кейин 2 март куни озод этилган. Бундан аввалроқ, 2020 йил 11 декабрда эса Кацина штатидаги ўғил болалар интернатидан 344 бола ўғирлаб кетилган. Улар ҳам воқеадан 6 кун ўтгач озод этилганди.

Нигерия президенти Муҳаммаду Бухорий ўтган ҳафта бундай ҳужумларга йўл қўймаслик учун барча мактаблар қўриқланишини кучайтиришни буюрган. Мамлакатнинг шимолий штатлари губернаторлари етарлича хавфсизлик таъминланмаган мактабларни ёптирган.