Қўқонда профилактика инспекторига пичоқ билан ҳужум қилинди

Жорий йил 18 феврал куни Қўқон шаҳри Садоқат маҳалласида яшовчи, 1988 йилда туғилган фуқаро А.Ш. маҳалла профилактика инспектори катта лейтенант Жаҳонгир Маҳмудовга қўнғироқ қилиб, ўғли — 2010 йилда туғилган, ўрта мактабнинг 9-синф ўқувчиси Ў.Ў.нинг хулқида жиддий ўзгаришлар кузатилаётгани, уйдагилар билан жанжаллашаётгани ҳамда мактабга боришдан бош тортаётгани ҳақида хабар берган.

Маълум қилинишича, профилактика инспектори ҳолатни ўрганиш мақсадида манзилга борган. Мурожаатчи аёлга фарзанд хулқ-атвори бўйича хизмат хонасида малакали инспектор-психологни жалб этган ҳолда профилактик суҳбат ўтказиш зарурлигини тушунтираётган вақтда, Ў.Ў. инспекторнинг орқа томонидан яқинлашиб, қўлидаги ошхона пичоғини ходимнинг чап орқа бел қисмига санчиб олган.

Оғир жароҳат олганига қарамасдан, Жаҳонгир Маҳмудов гумонланувчини жисмоний куч ишлатган ҳолда зарарсизлантирган ва воқеа жойига ёрдамчи кучларни чақиртирган. Ички ишлар органларининг ёрдамчи кучлари етиб келгач, хонадондагилар хавфсизлиги тўлиқ таъминлангани айтилмоқда. Шундан сўнг ходим шифохонага етказилиб, жонлантириш бўлимига ётқизилган.

Бирламчи текширув натижаларига кўра, ходимга “кўкрак қафаси чап орқа томони плевра бўшлиғига тешиб ўтган жароҳати, чап томонлама гемопневматоркс, ташқи ва ички қон кетиш” ташхиси қўйилган. Шифокорлар томонидан зарур тиббий ёрдам кўрсатилмоқда.

Ҳозирда мазкур ҳолат юзасидан Жиноят кодексининг 104-моддаси 2-қисми “б” банди билан жиноят иши қўзғатилиб, гумонланувчи процессуал тартибда ушланган.