Мексикада 6 млн дозага яқин қалбаки “Спутник V” вакцинаси мусодара қилинди

Шу муносабат билан вакцинани ишлаб чиқишда иштирок этган Россия тўғридан-тўғри инвестициялари жамғармаси (РТИЖ) Мексика ҳукумати, божхона идоралари ва қуролли кучларига миннатдорлик билдирган.  

Мексика берган маълумотларга кўра, қалбаки партия  Гондураснинг Сан-Педро-Сула аэропортига олиб кетилаётган бўлган, бироқ Мексиканинг Компече аэропортида ушланган. У хусусий самолётда Гондурасга етказилмоқчи бўлган. 

Мусодара қилинган қалбаки вакцинанинг умумий ҳажми 5 млн 775 дозани ташкил қилган. Қалбаки вакциналар иккита катта музлаткичда 1155та идишда ташилган ҳамда газли ичимликлар ва қандолат маҳсулотлари орасига яширилган бўлган.  

Мексика мутасадди идоралари самолётни тергов манфаати йўлида хатлаган, унинг экипажи ва йўловчиларини Мексика прокуратурасига топширган. 

РТИЖда таъкидланишича, мусодара қилинган партиянинг суратлари унинг оригинал вакцина билан ҳеч бир умумийликка эга эмаслигини кўрсатган. Жамғармада айтилишича, қалбаки вакцинани етказишга уринишлар Россия воситасига қарши иғволарга мисол бўлиши мумкин. Шунингдек, вакцина ҳақиқийлиги ва етказилишидаги хавфсизлик уни ишлаб чиқарган Гамалея маркази ва РТИЖ учун устувор аҳамиятга эга. Таъкидланишича, “Спутник V” фақат расмий каналлар орқали етказилади, у билан эмлаш эса расмий давлат дастурлари доирасидагина амалга оширилади.