АҚШ ва Хитой дипломатлари Аляскадаги учрашувда бир-бирини жиддий айблади

Аляска штатининг Анкориж шаҳрида 18 март оқшомида бўлиб ўтган учрашувда АҚШ давлат котиби Энтони Блинкен Хитойни киберҳужумлар, Вашингтоннинг ҳамкорларини иқтисодий шантаж қилиш, Ҳонгконгда инсон ҳуқуқларини бузиш ва уйғурларни таъқиб қилишда айблади. У, шунингдек, АҚШнинг Хитойга муносабати керак бўлса рақобатчи, керак бўлса ҳамкорлик асосида, керак бўлса душманларча бўлишини таъкидлади. «Пекиннинг ишлари глобал барқарорликка таҳдид солмоқда», дейди Блинкен.

Хитой томонидан Хитой коммунистик партияси марказқўми ташқи ишлар бўйича канцелярия раҳбари Ян Цзечи бунга хитой тилида ирод қилинган 15 дақиқалик нутқда АҚШдаги заифлашиб бораётган демократия, озчиликни таъқиб қилиш ва АҚШнинг ташқи ва савдо сиёсатини танқид қилди. «Сизлар нормал савдо алмашинувига халал бериш учун миллий хавфсизлик каби тушунчаларни суиистеъмол қиляпсизлар ва айрим давлатларни Хитойга ҳужум қилишга гиж-гижлаяпсизлар», деган у АҚШдаги полициянинг зўравонликлари, ирқчилик ва афроамерикаликларнинг ҳуқуқларини ҳимоя қилувчи Black Lives Matter ҳаракатини ёдга солиб.

Одатда бир неча дақиқа давом этадиган саломлашув нутқлари бир соатлик «жанг»га айланиб кетди. Иккала давлат делегациялари ҳам мубоҳасага киришиб кетганидан, журналистлар зални тарк этишга мажбур бўлишди. АҚШ вакили Хитой томонини 2 дақиқа давом этиши керак бўлган кириш нутқини чўзиш орқали протоколни бузишда айблади.

Учрашув натижаларига кўра, АҚШ делегацияси Анкорижда бўлиб ўтган АҚШ-Хитой музокараларининг илк сессияси «долзарб, жиддий ва ошкора» бўлгани, ҳар икки тараф ҳам ўз манфаат ва приоритетларини ифода эта олганларини маълум қилган. «Биз режалаштирганимиздек ўз манфаат ва приоритетларимизни ифода қилишда фойдаландик ва хитойлик ҳамкасбларимиздан ҳам худди шуни эшитдик», деган АҚШ дегегацияси вакили Reuters агентлигига берган интервьюсида.