Россия ташқи ишлар вазирлигининг билдиришича, Анатолий Антонов АҚШ президенти Жо Байден жамоасининг ишини таҳлил қилиш мақсадида маслаҳатлашувга чақирилган.
Россиянинг АҚШдаги элчиси Анатолий Антонов Вашингтонни тарк этди ва Москвага учиш учун Нью-Йоркка йўл олди, деб хабар бермоқда ТАСС.
Маълумот берилишича, у Нью-Йоркдаги Жон Кеннеди номидаги аэропортдан Москвага парвоз қилади.
Антонов 17 март куни Москвага чақирилганди. Россия ташқи ишлар вазирлигининг билдиришича, у АҚШ президенти Жо Байден жамоасининг ишини таҳлил қилиш мақсадида маслаҳатлашувга чақирилган.
Аввалроқ Жо Байден АҚШдаги сайловларга эҳтимолий аралашуви туфайли Россияни жавобгарликка тортмоқчи эканлигини айтганди.
У Россия президенти Владимир Путин билан суҳбатлашганини маълум қилган ва Путин айбдор бўлса, «бадал тўлаши»ни қўшимча қилганди.
