Байден 25 март куни илк матбуот анжуманини ўтказади

АҚШ президенти Жо Байден президент сифатида илк матбуот анжуманни ўтказади. Унинг матбуот вакиллари билан учрашуви президентлигининг 65-куни бўлиб ўтади. Одатда АҚШ президентлари бундай матбуот анжуманни президент лавозимини эгаллагандан кейин 40 кун ичида ўтказган.

Жумладан, АҚШнинг аввалги президенти Дональд Трамп биринчи матбуот анжуманини инаугурациясидан 27 кун, Барак Обама эса 20 кун ўтиб ўтказган. 

Байденнинг бундай ҳаяллаши кўплаб журналистлар томонидан саволлар пайдо бўлишига сабаб бўлган. Бироқ Оқ уй маъмуриятида Байден ҳозирда эътиборини пандемия оқибатларига қарши курашга ва вакцинанинг аҳоли ўртасида тақсимланишига қаратганини, шу сабабли матбуот билан тўлақонли суҳбат айни вақтда унинг учун устувор вазифа ҳисобланмаслигини айтишган.

Матбуот анжуман 25 март куни бўлиб ўтади. Бу охирги 100 йил ичида АҚШ президентлари инаугурациясидан кейин энг узоқ кутилган матбуот анжуман бўлади. 

Пандемия сабабли Оқ уйнинг шарқий залига фақатгина 30 журналист таклиф қилинган. Байден матбуот томонидан пандемия, миграция инқирози ва АҚШ қўшинларининг Афғонистондан олиб чиқилиши масалалари кўтарилишини кутмоқда.

Оқ уй матбуот котиби Жен Псакининг таъкидлашича, Байден журналистлар билан учрашувни интиқлик билан кутмоқда. Бу унга Америка халқи билан гаплашиш учун яхши имконият бўлади.