Навоийлик қиличбоз «Токио-2020» ёзги Олимпия ўйинларида иштирок этади

«Токио-2020» Олимпия ўйинларига тайёргарлик дастурига мувофиқ Ўзбекистон терма жамоаси аъзоси, навоийлик Малика Ҳакимова Жаҳон кубоги ҳамда Осиё кубогида мунтазам равишда иштирок этиб, жаҳон чемпионати саралаш мусобақаси якуний натижаларига кўра, Халқаро қиличбозлик федерацияси — ФИЕ қарорига биноан тўғридан-тўғри лицензия олиш имкониятига эга бўлди. 

Жисмоний тарбия ва спорт вазирлигининг маълум қилишича, Малика Ҳакимова 21-24 март кунлари Қозон (Россия) шаҳрида бўлиб ўтган якуний саралаш чемпионатида қиличбозликнинг шпага турида иштирок этиб, ўз шахсий ҳисобига қимматли очколар йиғишга эришган. Натижада, Токиодаги Олимпия ўйинларига тўғридан-тўғри лицензияни қўлга киритиш учун FIE томонидан рухсат этилган жаҳон рейтингидаги баллар йиғиндиси унга етарли бўлган.

Қиличбозлик бўйича аёллар ўртасида Олимпия ўйинларига тўғридан-тўғри қўлга киритилган ушбу лицензия Ўзбекистон тарихида илк бор қайд этилди.

Малика Ҳакимова Навоий шаҳридаги «Сўғдиёна» спорт комплексида 10 ёшидан қиличбозлик билан шуғуллана бошлаган. 2013 йилда кадетлар ўртасидаги Осиё чемпионати шахсий баҳсларида биринчи олтин медалини, 2015 йилда ўсмирлар ўртасидаги Осиё чемпионатида иккинчи олтин медалини қўлга киритган. Шунингдек, у Қозоғистондаги халқаро мусобақаларда ҳам олтин медаль соҳиби бўлган. 2019 йилда халқаро «Сателлит» ва Марказий Осиё чемпионатида 1-ўринни эгаллаган.