Танзила Норбоева бошчилигидаги делегация Россияга ташриф буюриши кутилмоқда

Яқин вақт ичида Россияга Ўзбекистон Олий Мажлиси Сенати раиси Танзила Норбоева бошчилигидаги делегация ташриф буюриши кутилмоқда. Бу ҳақда Россия Федерацияси кенгаши раисининг ўринбосари Николай Журавлёв маълум қилди, деб хабар берди Kun.uz мухбири.

 «Парламентларнинг юқори палаталари ўртасидаги ҳамкорлик бўйича комиссиянинг муваффақиятли иш тажрибасини қайд этмоқчиман. Ўтган йил сентябрда ўтказилган йиғилишда икки мамлакат қонунчиликларини уйғунлаштириш масалалари ҳам муҳокама қилинганди. Бу борадаги ишларни давом эттириш учун яқин вақт ичида Россияга Ўзбекистон Олий Мажлиси Сенати раиси Танзила Норбоева бошчилигидаги делегация ташриф буюриши кутилмоқда», – деди Журавлёв Тошкентдаги «Иннопром» кўргазмасида.

Танзила Норбоева 2019 йил октябрда Россия юқори палатаси раҳбари Валентина Матвиенко билан учрашганди. Федерация кенгаши спикери Ўзбекистонга ташрифи чоғида Олий Мажлис Қонунчилик палатасидаги ҳамкасблари ва президент Шавкат Мирзиёев билан учрашган ҳамда Бухорога борганди.