Поезд тўхтаб қолгач, йўловчилар вагонлардан чиқиб пиёда йўлга тушган.
Тошкент метросининг «Сергели» йўналишида ҳаракатланган поезд тўхтаб қолди. Kun.uz мухбирининг воқеа жойидан хабар беришича, ушбу йўналишда «Чилонзор» йўналишидаги «Олмазор» бекати томон ҳаракатланган метро поезди ер усти йўлида тўхтаб қолган.
«8 апрел, соат 10:45. Сергелидан келувчи поезд ер усти йўлида тўхтаб қолди. «Олмазор» ва 1-бекат оралиғида тўхтаган поезд машинистининг айтишича, бунга техник муаммо сабаб бўлган.
15 дақиқа кутишдан сўнг вагонлардан чиқиб пиёда йўлга тушдик. Йўлда кўрдикки, составни энергия билан таъминловчи қурилмалар парчаланиб кетган ва 30-50 метр масофага сочилган», – дейди мухбир Руслан Рамазанов.
«Ўзбекистон темир йўллари» АЖ матбуот хизмати хабар беришича, йўналишда ҳаракат тўхтатилгач, йўналиш бўйлаб бепул автобуслар хизмати ташкил этилган. Айни вақтда «Тошкент метрополитени» УК раҳбарияти воқеа жойида ҳодиса сабабларини аниқламоқда.
Эслатиб ўтамиз, 2020 йилнинг 26 декабр куни Сергели тумани аҳолисига қулайлик яратувчи икки инфратузилма объекти – ер усти метроси ва йўл ўтказгич фойдаланишга топширилганди.
Шунингдек, жорий йил 19 март куни «Олмазор» ер ости метро бекатидан Сергели йўналишининг «Чоштепа» ер усти метро бекати томон ҳаракатланиб кетаётган 4 вагонли таркиб тўхтаб қолган ва натижада шу йўналишда ҳаракатланиб келаётган навбатдаги таркиб тўхтаб турган вагонга бориб урилган.
