АҚШ компанияси унга ҳужум қилган ҳакерларга 5 миллион доллар тўлади  

АҚШнинг Colonial Pipeline компанияси ҳакерлик ҳужумидан кейин ишлашдан тўхтаган компьютер тармоғини тиклаш учун ҳакерларга 5 млн долларга яқин пул тўлади. Бу ҳақда Bloomberg ахборот агентлиги манбаларга таяниб хабар берди.  

Ҳакерлар талаб қилган пул Colonial Pipeline’га қарашли қувур тўхташига олиб келган киберҳужум куни – 7 майда тўлаб берилган. Таъкидланишича, сўралган пул кузатиб бўлмайдиган криптовалютада тўланган. Компания вакили бу борада изоҳ беришдан бош тортган.  

Маълум қилинишича, ҳакерлар пулни олгач, компанияга компьютер тармоғини тиклай олиши учун махсус воситани берган. Бироқ у секин ишлаган ва шу сабабли компания ўз ишини тиклаш учун бошқа усулларни қўллаган. 

Тахмин қилинишича, ҳужумни DarkSide гуруҳи ҳакерлари содир этган.  

Аввалроқ АҚШ ОАВ ҳакерлар Россия билан боғланган бўлиши мумкинлигини маълум қилган. Бироқ Оқ уй ҳужумга Россиянинг алоқаси йўқлигини айтган. АҚШ президентининг миллий хавфсизлик бўйича ёрдамчиси ўринбосари Энн Нюбергер ҳужумни бирор давлат эмас, балки ҳакерлар гуруҳи содир этганини таъкидлаб ўтган. 

11 май куни Россия президенти матбуот котиби Дмитрий Песков Россиянинг ҳакерлик ҳужумига алоқаси йўқлигини айтган.  

Colonial Pipeline’га ҳужум оқибатида АҚШнинг шарқий соҳилидаги аҳолининг 45 фоизини ёнилғи билан таъминловчи қувур иши издан чиққан. Таъкидланишича, тез орада компания ўз ишини тиклайди.  

Бу орада DarkSide ҳакерлари яна 4та навбатдаги «қурбони» ҳақида маълум қилган. Ҳакерлар ўз сайтида келтирган маълумотларга кўра, улар Италиянинг Valvitalia компанияси, Франциянинг Heli-Union вертолёт оператори, АҚШнинг Irving Materials қурилиш моллари ишлаб чиқарувчи компанияси ҳамда All American Asphalt компанияси маълумотларини ўғирлашган.

Ўғирланган маълумотлар орасида корпоратив электрон почта манзиллари, ички ҳужжатлар ва ходимларнинг шахсий маълумотлари, жумладан, паспорт нусхалари бор.