Италияда канат арқони узилиб кетди, 14 киши ҳалок бўлди

Италияда Альп тоғларидаги дор йўл кабинаси арқони узилиб ерга қулаши оқибатида камида 14 киши ҳалок бўлди. Бахтсиз ҳодиса Мажоре кўли яқинида Стреза коммунасини Ғарбий Альпдаги Моттароне тоғи чўққиси билан боғловчи фуникулёрда юз берган.

Il Messaggero нашрининг хабар беришича, кабина одамларни Стреза шаҳарчасидан Пьемонт вилояти ҳудудидаги Моттарроне тоғига олиб бораётганида ҳалокат рўй берган, дор йўлнинг пўлат арқони узилиб кетиши оқибатида кабина етиб бориш қийин бўлган ўрмон ҳудудига қулаган. Бу эса қутқарув амалиётини ўтказишни қийинлаштирган.

Воқеа жойида 5 ва 9 ёшларда бўлган икки бола жароҳатланган ҳолда топилган. Улар қутқарув хизматлари вертолётида Туринга етказилган. Аммо 9 ёшли бола шифохонада жон берган. Иккинчи бола ҳушига келган, шифокорлар уни операция қилишган.

Қутқарувчилар қурбонлар сони ошиши мумкинлигидан огоҳлантирган.

Авария жойида қутқарувчилар, полиция ва ўт ўчирувчилар ишламоқда.

Бу авария ҳақида нималар маълум?
Авариянинг аниқ сабаби ҳозирча маълум эмас, аммо гувоҳларнинг сўзларига кўра, кабина мустаҳкамланган металл трос Моттароне чўққисидаги белгиланган манзилга етишга 300 метр қолганда узилиб кетган.

Стрезани Моттароне билан боғловчи кўтарма йўл 20 дақиқа ичида йўловчиларни денгиз сатҳидан 1491 метр баландликдаги манзилга етказади.

Арқон йўли кабинасининг сиғими 40 йўловчига мўлжалланган. Қулаган кабина ичида қанча одам бўлгани ҳозирча номаълум.

Қутқарув хизматига сигнал маҳаллий вақт билан кундузи келиб тушган.

Қутқарувчилар юқоридан тушиб кетган кабинани ерда деярли бутунлай пачоқланиб, остин-устун бўлган ҳолда топган. Кабина 20 метр баландликдан қулагач, ерда бир неча бор ағдарилган, кейин дарахтлар билан тўқнашиб тўхтаган.

Италия бош вазири Марио Драги аварияни фожиа деб атади.

«Ҳукумат номидан ҳалок бўлганларнинг оилаларига ҳамдардлик билдираман, хаёлим жабрланган болалар ва уларнинг ота-оналари билан», дея қайд этилган расмий баёнотда.

Маълумотларга кўра, дор йўл 1970 йилда очилган бўлиб, у одамларни Лаго-Мажоре кўлидан 1,5 минг метр баландликдаги Моттароне тоғи чўққисига олиб чиққан. Бутун йўналиш 20 дақиқа вақт олган. 2014-2016 йилларда дор йўл инфратузилмасини янгилаш бўйича ишлар ўтказилган.

Италиянинг тоғли курортларидаги дор йўллар пандемия сабабли қишки мавсум ёпиқ бўлгандан кейин ушбу дам олиш кунларигина ишлай бошлаган.