Токио Олимпиадаси очилиши ва ёпилиши томошабинларсиз ўтади - Asahi

Токио Олимпиадасининг очилиш ва ёпилиш маросимлари коронавирус пандемияси сабабли оддий томошабинларсиз ўтади.

The Asahi япон нашрининг хабар беришича, Ўйинлар ташкилотчилари ва Япония ҳукумати Олимпиаданинг очилиш маросимига фақат юқори мартабали меҳмонлар ташриф буюра олишлари, оддий томошабинлар эса трибуналарга қўйилмаслиги ҳақидаги қарорни қабул қилди. Маросимда иштирок этувчи меҳмонлар сони 10 мингдан камроқ бўлади.

Ҳозирда бу масала бўйича охирги муҳокамалар олиб борилмоқда. Ушбу қарор ҳақида 8 июлда расман эълон қилиниши кутилмоқда. 8 июлда ушбу масалалар ХОҚ президенти Томас Бах, Токио мэри, Олимпиада ташкилий қўмитаси вакиллари иштирокидаги музокараларда муҳокама қилинади.

Бундан ташқари, ташкилотчилар мухлисларга соат 21:00дан кейин мусобақаларга ташриф буюришни тақиқлашмоқчи. Эрталабки ва кундузги соатларда ареналар тўлиши ўз сиғимдорлигининг 50 фоизидан ошмайди.