Францияда 114 минг киши санитар рухсатномаларга қарши намойишларга чиқди

Францияда коронавирус пандемияси вақтида кафе ва ресторанларга ташриф буюришга рухсат берувчи санитар рухсатномалар жорий қилинишига қарши намойишлар бўлиб ўтди. 17 июлда бўлиб ўтган ушбу намойишларга 114 минг киши қатнашган.   

Шундай намойишлардан учтаси Парижда ўтган. Ҳукумат маълумотларига кўра, уларда 18 минг киши иштирок этган. Шаҳар полицияси бир неча соатга марказий кўчаларни ёпишига тўғри келган. 

Париж жанубида ўтган намойишлар иштирокчилари “Эркинлик” ва “Санитар рухсатномага йўқ” деган шиорларни ҳайқиришган. Одамлар “Марсельеза”ни куйлашган ва ҳукуматни коронавирусга қарши янги чекловларни киритиш режасидан воз кечишга чақиришган.

Худди шундай намойишлар Нант, Страсбург, Перпинян, Бордо, Ницца, Тулуза ва бошқа шаҳарларда ўтган.

12 июлда Франция президенти Эмманюэл Макрон мамлакатда эпидемиологик вазият ёмонлашгани сабабли тиббий ходимлар ва бир қатор соҳалар ишчилари мажбурий эмланишини эълон қилган. Августдан Францияда бар, ресторан ва савдо марказларига ташриф буюрувчилардан санитар рухсатномалар талаб қилина бошланади. Самолётлар ва узоқ масофаларга қатновчи поездларга фақат эмланганлар ва коронавирусга қарши манфий тест топширганларгина қўйилади.