Дунёнинг энг яхши авиакомпанияси маълум қилинди

Австралиянинг йўловчи авиаташувлари хавфсизлиги ва сифатини баҳолашга ихтисослашган AirlineRatings.com агентлиги дунёнинг энг яхши авиакомпаниялари ҳар йилги рейтингини тақдим қилди.

Авиакомпаниялар бир қатор кўрсаткичлар, жумладан йўловчиларнинг авиакомпания ҳақидаги фикри, авиакомпания таклиф қилувчи хизматлар турфалиги, ҳаво парки ёши, пандемия вақтида кўрилаётган чоралар бўйича баҳоланган.

AirlineRatings.com мутахассислари жорий йилда Қатарнинг Qatar Airways авиакомпаниясини энг яхши авиакомпания деб топишган. У рейтингнинг кўп йиллик етакчиси Air New Zealand’ни 2-ўринга тушириб юборган.

Қатар авиакомпаниясининг йўловчилар учун янги маҳсулотлар киритгани, парвоз вақтида юқори сифатли хизмат кўрсатиши, инновационлиги ҳамда пандемия вақтида ҳам парвозларни тўхтатмасликка ҳаракат қилгани юқори баҳоланган.

Етакчи ўнталикдан Airlines, Qantas, Emirates, Cathay Pacific, Virgin Atlantic, United Airlines, EVA Air, British Airways ҳам ўрин олган.

Жумладан, Qantas аэропортларда энг яхши дам олиш хоналарига эга авиакомпания, Singapore Airlines 1-синфда энг яхши хизмат кўрсатувчи авиакомпания, Virgin Australia эса энг яхши экипажга эга авиакомпания деб топилган.

Шунингдек, Европа, Осиё-Тинч океани ҳамда Шимолий ва Жанубий Американинг энг яхши бюджет авиакомпаниялари маълум қилинган. Бунга мос равишда EasyJet, Jetstar ва Southwest сазовор бўлган.

Тайёрлаган: Шуҳрат Раҳимов

#авиакомпания #Qatar Airways