МСК: “Президентликка номзодларга қўйиладиган талаблар ўзгармаган”

Марказий сайлов комиссияси раиси ўринбосари Баҳром Қўчқоровнинг маълум қилишича, президент сайловларида қатнашадиган номзодларга нисбатан қонунчиликда белгиланган талабларда ўзгариш йўқ.

«Номзодларга талаблар ўзгаргани йўқ. Сайлов кодексида қандай талаб бўлса, ўша талаблар амалда. Ҳеч қандай янгилик ёки ўзгариш йўқ.

Фақатгина бир нарса янгилик бўлди, энди сайлов бюллетенида лавозим ёзилмайди, фамилия, исм-шарифи ёзилади холос», дея Баҳром Қўчқоровнинг сўзларини келтирмоқда Kun.uz мухбири.

Сайлов кодексининг 61-моддасига кўра, ўттиз беш ёшдан кичик бўлмаган, давлат тилини яхши биладиган, бевосита сайловгача камида ўн йил Ўзбекистон ҳудудида муқим яшаётган фуқаро Ўзбекистон президенти этиб сайланиши мумкин.

Қонунда қасддан содир этилган жинояти учун илгари судланган фуқаролар; диний ташкилотлар ва бирлашмаларнинг профессионал хизматчилари президентликка номзод этиб рўйхатга олинмаслиги белгиланган. Шу билан бирга, айни бир шахс сурункасига икки муддатдан ортиқ Ўзбекистон Республикаси Президенти бўлиши мумкин эмас.

Аввалроқ, Баҳром Қўчқоров бу йилги президент сайловида сайловчилар ташаббускор гуруҳи президентликка номзод кўрсатиш ҳуқуқига эга эмаслиги, фақатгина сиёсий партиялар томонидан илгари сурилган номзодлар қатнашиши мумкинлигини маълум қилган эди.

#МСК #Баҳром Қўчқоров

Сайлов қонунчилигига киритилган ўзгартишларга кўра сайловлар октябр ойи учинчи ўн кунлигининг биринчи якшанбасида ўтказилиши белгиланди. 2021 йилги президентлик сайлови 24 октябрга тўғри келмоқда.