Инновацион ривожланиш вазирлиги ва Фармацевтика тармоғини ривожлантириш агентлиги таклифига кўра, 23 июль куни Хитойнинг “Anhui Zhifei Longcom Biopharmaceutical” компанияси делегацияси Тошкентга етиб келди.
Вазирлик хабарига кўра, делегация ҳозирда республикада қўлланилаётган ZF-UZ-VAC2001 вакцинасини ишлаб чиқараётган мазкур компаниянинг бош муҳандиси Ванг Зижун, Экспорт бўлими бошлиғи Чен Фангву ҳамда Чу Йингжин ва Ли Жифяо каби мутахассислардан иборат.
Делегация пойтахтга Ўзбек-Хитой вакцинасини Ўзбекистонда ишлаб чиқаришни йўлга қўйиш бўйича музокаралар олиб бориш мақсадида ташриф буюрди. Мутахассислар вакцина ишлаб чиқариш учун инфратузилмавий имкониятларини баҳолайди.
Маълум қилинишича, Хитой Фанлар академияси SARS-CoV-2 коронавирусига қарши номзод вакцинасини яратиш лойиҳасининг ташаббускори ва координатори ҳисобланади. Инновацион ривожланиш вазирлиги ҳузуридаги Илғор технологиялар маркази ва Соғлиқни сақлаш вазирлигининг Вирусология илмий-тадқиқот институтининг вакцина синовларида иштироки, шунингдек, клиник тадқиқотларга қўшган ҳиссаси натижасида Ўзбекистон вакцина ҳаммуаллифи сифатида эътироф этилган.
