Россия бензин экспортини тақиқламасликка қарор қилди

«Бензин экспортига тақиқ жорий этиш тасдиқланмади. Нефтчиларга биржага бензин етказиб бериш ҳажмини кунига камида 5 минг тоннага етказиш тавсия қилинди», деди Аркуша. Унинг қўшимча қилишича, нефтчилар бу қадамга тайёр эканликларини билдирган. 

Аркушанинг айтишича, Новак ва нефтчилар учрашувида суюлтирилган газ бозори муаммолари ҳам муҳокама қилинган. Унинг сўзларига кўра, «Газпром» конденсат тайёрлаш заводидаги авария туфайли суюлтирилган газ бозорида сотув билан боғлиқ қийин вазият сақланиб қолмоқда. Узоқ Шарқда ёнилғи нархининг номутаносиблиги ва бу ҳудудга бошқа нефтни қайта ишлаш заводларидан ёнилғи етказиб бериш учун субсидиялар жорий этиш имконияти алоҳида йиғилишда муҳокама қилинган.

РБК манбасининг аниқлик киритишича, аввалроқ мамлакат Энергетика вазирлиги бундай субсидияни бир тонна учун 4 минг рубль миқдорида киритишни таклиф қилган, лекин Молия вазирлиги ташаббусни рад этди, сабаби маблағ ажратиш манбаси аниқланмаган. 

Июль ойи охирида Россиянинг Европа қисмида «Премиум-95» (АИ-95) бензинининг биржа нархи бир тонна учун 60 минг рубллик чегадан ўтиб, тарихий максимал даражага етди. Шундан сўнг, Энергетика вазирлиги ҳукуматга бензин экспортини тақиқлашни таклиф қилди. 

Биржа баҳоси ёнилғи қуйиш шохобчаларидаги бензин нархига бевосита таъсир қилмайди: уларнинг ўсиши инфляция билан чегараланади. Бироқ, Россияда демпфер механизми мавжуд, унга кўра йирик ёнилғи ишлаб чиқарувчилар чакана бозорда нархларни ушлаб туриш учун бюджетдан оширилган тўловларни олади. 1 октябргача бензин экспортини тақиқлашни жорий этиш ташаббускорларидан бири ана шундай мустақил тармоқларни бирлаштирган Россия ёнилғи иттифоқи бўлди.