Малайзия бош вазири Муҳиддин Яссин парламентдаги мухолифат билан музокаралар муваффақиятсиз якунлангандан кейин ўз истеъфосини эълон қилди. У бу қарори ҳақида подшоҳ Абдуллоҳ ал-Мустафо қабулида бўлгандан кейин ўз телемурожаатида маълум қилди.
Маълумотларга кўра, Яссин 16 август эрталаб ҳукуматнинг охирги йиғилишини ўтказган ва шундан кейин подшоҳ қабулида бўлиб, унга истеъфога кетмоқчилиги ҳақида маълум қилган.
“Мен парламентда кўпчилик қўллаб-қувватловини йўқотганим сабабли кетмоқдаман”, деб айтган бош вазир. Подшоҳ саройида таъкидланишича, подшоҳ Яссиннинг истеъфосини қабул қилган, бироқ у янги бош вазир тасдиқлангунча ўз лавозимида қолади. “Айни вақтда подшоҳ парламентни тарқатиш ва муддатдан олдин сайловлар ўтказилишидан манфаатдор эмас”, деб айтилган подшоҳлик саройи баёнотида.
Шунингдек, Малайзия ҳукумати ҳам тўлиқ таркибда истеъфога чиқишга ариза берган.
Таъкидланишича, Яссин овоз беришдаги кичик устунлик билан 2020 йил март ойида бош вазир лавозимини эгаллагандан бери унинг ҳукумати омонатгина қолаётганди. Ҳукмрон коалиция блокида энг йирик ҳисобланган Бирлашган малай миллий ташкилоти (UMNO) партиясидан баъзи депутатлар бош вазирни қўллаб-қувватлашдан бош тортиб, унинг истеъфосини талаб қилгандан кейин Яссинга босим янада кучайган.
Яссин охирги 2 ҳафта давомида парламентдаги мухолиф партиялар билан муросага келишга ҳаракат қилган. Бош вазир уларга бир қатор сиёсий ислоҳотлар, жумладан бош вазир лавозимини эгаллаш максимал муддатини чеклашни, депутатларга бир партиядан иккинчисига ўтишни қонунан тақиқлашни таклиф қилган.
Яссин бу уринишлари бесамар якунлангач, 15 августда ўзининг Малайзия ерлари ўғлонлари бирлашган партиясидаги сафдошларини бош вазир лавозимини тарк этмоқчи эканлигидан хабардор қилган.
Маҳаллий сиёсатшуносларнинг баҳолашича, Яссин парламентнинг 222 депутатидан тахминан 100 нафари томонидан қўллаб-қувватланган.
Малайзия конституциясига кўра, бош вазир парламентдаги кўпчиликнинг қўлловини йўқотса, истеъфога кетиши керак ва подшоҳ парламент ишонч билдирадиган янги бош вазирни тайинлаши мумкин.
