Малайзияга саёҳатга борган уч ўзбекистонлик "айбсиз айбдор" бўлиб ўлимга ҳукм қилинганди — собиқ ДХХ ходими

Бундан 10–11 йил аввал Малайзияда гиёҳвандлик моддалари билан ушланган ўзбекистонликлар осиб ўлдириш жазосига ҳукм қилинган. Улар ўзлари танимаган одамларга тегишли гиёҳванд моддаларни олиб киргани учун қўлган олинган. Эътиборлиси улар жомадонларига гиёҳванд модда яширилганидан бехабар бўлган. Бу ҳақда собиқ ДХХ ходими ўз хотиралари билан бўлишган.

Фото: Видеодан кадр

Истеъфодаги ДХХ ходими Ўктам Сувонов Xavfsizlik YouTube каналига берган интервьюсида айтишича, бундан 10-11 йил аввал ўзбекистонлик 2 аёл ва 1 эркак саёҳат мақсадида Малайзияга боришади. Улар ўзлари танимаган одамларга тегишли гиёҳванд моддаларни олиб киришгани учун қўлга олинган. Эътиборлиси улар жомадонларига гиёҳванд модда яширилганидан бехабар бўлган. Сувонов хизмат фаолияти давомида мазкур ишга ойдинлик киритиш мақсадида Малайзияга бориб, ўлим жазосига ҳукм қилинган ўзбекистонликлар билан учрашув тафсилотларини шундай хотирлайди:

“Бир ўрмон ичида жойлашган қамоқхонага бордим. Жуда аянчли, аёллар қамоқхонаси. Камерага кириб, ўлим жазосига ҳукм қилинган ўзимизнинг фуқароларни кутдим. Эшик очилиб, бир онахонни олиб келишди: 56 ёшда, қўл-оёғида кишанлар, боши эгилган. Кийим ҳам алламбало рангда. Олиб келганлар ўзларининг тилида “тўғри қара” деди. Аёл мени кўрди-ю, икки кўзидан дув ёш оқди. “Менинг ҳаётимда охирги кўраётган ватандош ўзбек сиз бўлсангиз керак.

Ўша аёллардан бирининг қизи хорижлик фуқарога эрга теккан, маълум вақт ўтгандан кейин онасини Малайзияда текинга дам олиб кетишга таклиф қиляпти. Онаси қўшнисини олади, бу қўшни 54 ёшли, бир умр 25 ёшдаги ногирон қизига қараб ўтаётган аёл эди. Уни олишган, яна бир таниш йигитни олиб учови хурсанд бўлиб Тошкентга келишган. Учиб кетиш олдидан аэропортда уларнинг олдига бир нотаниш йигит келиб учта бўш чемодан берган, “шу чемоданга нарсаларингизни жойлайсизлар, учиб кетасизлар” деган. Улар нима бўлаётганига тушунмай чемоданни олиб нарсаларини жойлаб, самолётга кечикиб боришган ва ўтиб кетишган. Куала-Лумпурда тушгандан кейин уларни ҳеч ким кутиб олмаган.

Аэропорт хавфсизлик хизмати текширувида уларнинг чемоданидан ҳар биридан 4 килограммдан синтетик гиёҳванд модда (метамфетамин таблеткаси) чиқади. Сўроқда улар буни кимдан олганини, ким олиб келиб берганини ҳам айта олишмаган ва айбсиз айбдорга айланишган.

Иккинчи аёл билан гаплашганимда шунчалик эзилганманки, тасаввур қилинг у аёл 25 йил давомида уйда ўтириб ногирон боласини тарбиялаб-ўстирган. “Юринг, бир дам олиб, ҳаво алмаштириб келасиз, муаммоларингизни сал унутасиз”, деб олиб кетилиб, ўлимга олиб боряпти. Хаёлига ҳам келмаган нарса”.

Собиқ ДХХ ходими интервью давомида мазкур сафарни ташкил этган шахсларни, жумладан, онасини Малайзияга таклиф қилган қиз ортида ким турганини аниқлашга ҳаракат қилганини, бироқ бунинг уддасидан чиқа олмаганини айтди. Айни пайтда бу 3 нафар ўзбекнинг кейинги тақдири номаълумлигича қолган.